काठमाडौं।
सरकारले शिक्षा तथा मानव स्रोत विकास केन्द्र र शिक्षा विकास तथा समन्वय एकाइको नाम परिवर्तन गर्ने तयारी गरेको छ ।
मन्त्रालयस्रोतका अनुसार अब बस्ने मन्त्रिपरिषद् बैठकमा पुरानै नाम शिक्षा विभाग र जिल्ला शिक्षा कार्यालय राख्ने प्रस्ताव मन्त्रालयले लैजाने तयारी गरेको छ ।
‘पहिलेको नाम संसारभार नै चिनिएको र काम अहिले पनि उही भएकाले पुरानै नाम राख्न सुझाव आएको हो,’ मन्त्रालयका प्रवक्ता दीपक शर्माले भने, ‘पहिले क्याबिनेटले नाम परिवर्तन गरेको हो । आवश्यक पर्यो भने अहिले पनि क्याबिनेटले परिवर्तन गर्छ ।’
नाम परिवर्तनको प्रस्ताव क्याबिनेटमा लैजानेबारे आफूलाई थाहा नभएको उनले बताए । यसअघि २०७५ सालमा तत्कालीन शिक्षा विभागको नाम परिवर्तन गरी शिक्षा तथा मानव स्रोत विकास केन्द्र र जिल्ला शिक्षा कार्यालयको नाम शिक्षा विकास तथा समन्वय एकाइ बनाइएको थियो ।
