दिपकजंग शाही
काठमाडौं । कर्णाली प्रदेश सभाका माओवादी केन्द्रका सांसद ठम्मरबहादुर विष्टले राजीनामा दिएका छन्।
माओवादी संसदीय दलका प्रमुख सचेतक समेत रहेका उनले पार्टीको सदस्यता समेत नरहने गरी आज राजीनामा दिएका हुन्।
विष्ट क्षेत्र १ ‘क’ सुर्खेतबाट निर्वाचित सदस्य हुन्।
शुक्रबार उनले प्रदेश सभा सचिवालयमा इमेलमार्फत् राजीनामा दिएको प्रदेश सभा सचिवालयका सचिव जीवराज बुढाथोकीले बताए।
उहाँले इमेलबाट राजीनामा बुझाउनु भएको हो’, उनले भने,‘यद्यपि उहाँको राजीनामा पत्र प्रदेश सभा सचिवालयमा दर्ता भएको छैन।’
विष्टले राजीनामा दिनुपर्ने दुई आधार उल्लेख गरेको बुढाथोकीले बताए।
एमसिसी पारित गर्नमा पार्टीले सहयोग र पार्टी नेतृत्वले दलीय अधिकार संकुचित गरेर अगाडि बढेको उनको राजीनामा पत्रमा उल्लेख भएको बुढाथोकीले बताए।
यद्यपि राजीनामाबारे बुझ्न खोज्दा विष्टसँग सम्पर्क हुन सकेन।
