काठमाडौं । प्रतिनिधि सभाको बैठकमा एमसिसी टेबल हुने भएपछि बानेश्वर तनावपूर्ण बनेको छ।
प्रतिनिधि सभाको बैठकमा सरकारले एमसिसी टेबल गर्ने भएपछि त्यसैको विरोधमा उत्रिएका प्रदर्शनकारीमाथि प्रहरीले पानीको फोहराले हानेको हो।
अहिले प्रहरीले अश्रुग्यास पनि प्रहार गरेको महानगरीय प्रहरी कार्यालय रानीपोखरीका प्रहरी उपरीक्षक सन्तोषसिंह राठौरले जानकारी दिए।
अहिले सशस्त्र प्रहरी पनि बानेश्वरमा खटिएको छ।
प्रहरीले सशस्त्र प्रहरीको एउटा गरी तीन वटा पानीको फोहरा हान्ने गाडीको प्रयोग गरेको छ। पानीको फोहरा हानेर प्रहरीले भीडलाई तितरवितर गर्ने प्रयास गर्दैछ।
यस्तै, प्रदर्शनकारीहरूले पनि प्रहरीमाथि ढुंगा हानेका छन्। त्यहाँबाट प्रहरीले केही प्रदर्शनकारीलाई नियन्त्रणमा लिएको छ। यद्यपि नियन्त्रणमा लिएकाहरूको संख्या भने प्रहरीले सार्वजनिक गरिसकेको छैन।
आइतबार बिहान बसेको गठबन्धनको बैठकले प्रतिनिधि सभामा एमसिसी टेबल गर्ने निर्णय गरेको थियो।
प्रतिनिधि सभाको बैठकमा एमसिसी टेबल भए पनि प्रमुख प्रतिपक्षी दल नेकपा एमालेले संसद अवरूद्ध जारी राख्ने जनाएको छ।
